攀爬石澗小技巧

玩澗小技巧 


最近見到好多新人學習玩澗，十分高興見到o甘多多參與這項富有挑戰性o既運動，但挑戰性背後其實隱藏很大的危險，我初初玩澗o既時候就係吾識死所以受過嚴重o既傷，雖然我玩澗吾係好勁，但希望以我有限o既經驗去帶大家認識多少少這項運動，等大家玩得開心，亞媽放心，我就如願矣足o拉！ :D 以我自己理解，玩澗可以分為三部份： 1) 睇位 2) 步法 3) 攀爬 現在我試解說每項。 


1) 睇位 可以再分為辨別濕位同判斷手腳位 a) 辦別濕位 好多見到濕o既石都會避開，其實當你見得多濕石之後，你就能夠分辦出邊一舊石跣，邊一舊吾跣，練習方法可以多d o係平澗用腳去感受濕石，當你試得多之後你就會掌握到濕石過澗o既方法。 b) 判斷手腳位 當你要爬過險位o既時候，最先要做o既野就係計算o西由底到頂你會用手拉邊個o位，隻腳會踏邊個位，再諗埋如果吾掂可以停係邊個位，再叫人o黎幫你。記往，所有險位都要有八成以上把握才好試，要知道你係玩，吾係搏命！ 


2) 步法 我個人並不鼓勵跳，雖則你已經練到好好o既睇位，你都有機會錯，如果你跳到一舊吾穩o既石，你可以受好大o既傷！ 步法最主要幫助你o係石澗?可以好平穩o甘前進，當你睇位準確既時候，每一步盡量落o係石罅或者凹凸不平既地方，因為o甘樣可以增加鞋同石之間摩擦o黎達到平穩o既目的。在濕o既石面就更加實用。 如果想快，只要大大步o甘行就可以增加速度，跑只會o西力同增加受傷o既機會。


3) 攀爬 當爬險位既時候，最重要係保持到平衡，所以初學者一定要掌握到自已重心係邊，熟習當自已爬動時重心既移動，用三肢去做成三腳架效應去將重心保持在自己與山壁之間而吾係後面。 當攀爬時很多人喜歡用拉o既方法借力而上，呢個方法最大風險係拉到碎石，其實係吾確定o既情況下可以試下o禁住石頭借力上，因為就算o禁住o既係碎石都吾會連人帶石跌落o黎！ 石澗o既走勢通都起伏不定，行石澗一般都好容易跟住起伏而行，其實十步之內自己可以判斷需吾需要上高走底，盡可能都向低而行，因為除可以省力外，亦可以減低因爬高而受傷o既機會。 以上所講就係玩澗最基本o既技巧，如果想練習最好搵d一兩粒星o既石澗，吾好睇少呢d石澗，因為你可以係一個位重複練習好多次而吾受傷，如果去五星o既澗練，失手一次就可能要長休！ 香港有好多石澗，最多人玩既要算九大石澗，在玩完九大石澗大家都會想試試其他石澗，不過九澗以外大家可能會面一d新o既危機，我諗祁前輩選九澗既準則應該係以澗容大，乾澗同少碎石為本，但係九澗以外大家都要面對以上風險。 以下我嘗試將一d石澗分類等大家心目中有個準則。 初學 大城，屏南，橫涌，蓮花，燕岩溪，猴塘溪，田尾坑，馬大石澗 , 雙鹿 進階 萬丈布，昂深，黃龍，藏龍，東龍，北天門，南天門 高級 西馬肚，龍顎，臥龍，降龍 以上石澗，由進階開始就要不少於三個有經驗領隊帶領，一定要好小心玩避免意外發生。 至於香港最險o既三澗鳳壁，懸龍同東馬肚我就吾提議大家玩，因為似玩命！ 希望以上能夠幫到大家，記住玩得安全，大家開心！ :) 如有錯漏，請各界指正。 


 --------------------------- 


最險o既三澗未及最險o既三地。 
1)象額脊(馬鞍山) 
2)彌天壁(都係馬鞍山) 
3)鳳羽壁(鳳凰山)

http://ramsss.com/hk/sports/hiking